Les actuaciones arqueolóxiques desendolcaes nos llugares de Vigaña y Castañera (Miranda) ente los años 2013-2016 enmárquense dientro del proyectu «Poder central y poderes locales entre la Antiguedad Tardía y la Alta Edad Media, 400-900 d. C. El norte de Hispania y su contexto europeo»(Ref. HAR2013-47889-C3-3-P) financiáu pola Secretaría d’Estáu d’I+ D+ i del Ministeriu d’Economía y Competitividá. Continúen los trabayos que’l nuestru equipu d’investigación vien desarrollando nel llugar de Vigaña de magar l’añu 2009 (Fernández Mier y González Álvarez, 2013; Fernández Mier et al., 2013), baxo la consideración de que pa pescudar los procesos de construcción del paisaxe, tienen qu’analizase arqueolóxicamente tolos elementos que conformen el territoriu, dende los llugares d’habitación a les zones de pastu, pasando pelos espacios de llabrantíu: necrópolis, hábitats, terraces, sistemes de riegu, construcciones ganaderes (Fernández Mier et al., 2014; Fernández Mier y Alonso González, 2016; González Álvarez et al., 2016; López Gómez et al., 2016). Esti proyectu ye un subproyectu coordináu con otros dos desendolcaos dende la Universidá de Salamanca y el CSIC con títulu:«Colapso y regeneración en la Antigüedad Tardía y la Alta Edad Media: el caso del noroeste peninsular», que tienen como finalidá l’estudiu de los procesos de colapsu y rexeneración del noroeste peninsular ente los sieglos v al x pente medies de dos escales d’análisis. La primer escala refierse al poder central, perpasando los vieyos clixés (les invasiones bárbares, la repoblación) pa comprender los fenómenos emplegando una variedá mayor de factores. La segunda, sobro la que quier ponese un enfotu mayor y que ta directamente rellacionada coles